Efst á baugi er að mig bráðvantar bílfar til Húsavíkur, þar sem haldin verður afmælisgleði á morgun. Ef einhver er með laust far í bílnum sínum eða veit um slíkt þá bið ég hann/hana að hafa samband.

Annað, ekki eins bráðmikilvægt, í fréttum er að ég fór í Pennann/Bókval um daginn. Þar var meiningin að kaupa skólabækur og hafði móðir mín látið mig hafa peninga til þess. Ég endaði með þrjár skólabækur og fimm skáldrit. Það var útsala sjáiði til, og ég bara réði ekki við mig.

Ég keypti samt einungis öndvegisbækur. Ævintýri góða dátans Svejks, sem ég er reyndar búin að lesa en þetta er bók til að eiga. Ódysseifskviðu keypti ég líka í þeirri von að ég gæti skilið eitthvað í miðaleiknum þegar Kristján Einarsson tekur þátt. Sporar, stílar Nietzsches fannst mér spennandi rit svo ég festi kaup á því. Seinast en ekki síst keypti ég svo tvö eintök af sömu bók; Leiðarvísir í ástarmálum, handbók hjóna og ástarbréf. Annað eintakið gaf ég Olgu í afmælisgjöf, hitt ákvað ég að eiga sjálf. Þetta er frábær bók, í henni eru leiðbeiningar til ungra kvenna og karla, auk ástarbréfa og hjónabandsráðlegginga, allt skrifað á árunum 1922-1927.

Eftirfarandi texta er ég að hugsa um að lesa upp, syfjuð og stressuð, í tjáningartímanum í fyrramálið:

Að lita andlitið.

Það virðist færast í vöxt, að konur liti andlit sitt með ýmsu móti og ævinlega í þeim tilgangi að sýnast fallegri en þær eru í raun og veru.
En nú skal ég segja þér eitt: Andlit þitt er svo fallegt frá skaparans hendi - þó að þú sért óánægð með það - að þú getur eigi gert það fallegra með gervilitum ("smínki"). Hann hefir engan skapað ljótan og áreiðanlega ekki ætlast til þess, að nein af dætrum hans færi að mála sig í framan.
Þú getur með mörgu móti varðveitt fegurð þína, en til "smínksins" máttu aldrei grípa.
Lauslætiskonan - sem er litljót - á að hafa einkarétt á því að "smínka" sig.
Þú skalt aftur á móti bera gott og litlaust "créme" á andlit þitt og núa eða strjúka andlitsvöðvana um leið.
Það heldur húðinni vel mjúkri og kemur í veg fyrir allar hrukkur, sem sett gætu skugga á fegurð þína. - Þú mátt einnig nota lítið eitt af andlitsdufti ("púðri"), en það má ekki vera áberandi.

Þar höfum við það stelpur, skaparinn vill ekki að við málum okkur í framan. Engu að síður verður glimmer í andlitinu á mér á morgun.